Antes pa man nagpandemic, madamo na nga mga panimalay kag bisan mga commercial establishment ang naga-gamit sang solar power.
Halin sa mga solar floodlights nga sarang makapasanag sang garden kag mga dalan asta sa mga dalagko nga mga solar panel nga nagakahatag kasanag sa mga high-rise building.
Kasubong na lamang sang siudad sang La Carlota nga nagtukod sang P2 million solar panel set-up sa atop lang sang city gym.
Nagapati si Mayor Rex Jalandoon, nga ang pag-gamit sang solar installation ang makabulig para maka-kinot ang siudad sa bulanan nga balayran sa kuryente sa masunod nga apat ka tuig.
Ang 25 kilowatt peak grid-tie system ang sarang makahatag sang electrical power sa duha ka mga regional trial courts nga yara sa gym.
Bangud grid-tie system ang siudad ang sarang man makabaligya sang excess power nga ma-generate sini kun weekend sa local power distributor.
Suno sa negosyante nga si Paul Dingcong, ang solar panel set-up ang may minimum capacity nga maka generate sang 100,000 watts per day nga sarang man makahatag sang electrical power sa isa ka gatus nga mga balay nga may 1,000 watts nga daily consumption.
Sa paghinun-anun sang alkalde sa mga local nga opisyales kag mga barangay captains iya man ginduso ang pagdugang sang solar power set-up sa merkado sang siudad.
Nagalaum ang alkalde nga sa madasun nga tinuig mangin isa ka green city ang La Carlota pinaagi man sa pag gamit sang renewable energy.