Ginaklaro sang Vice Mayor sang Silay City nga ang ila konseho wala naga pamatuk sa bulk water project sang probinsya. May pila ka mga punto nga luyag sila nga ma klaruhan suno sa iya.
Ang Silay City na lamang sa mga LGU nga nasakpan sang 1.2 billion peso bulk water project sang probinsya ang wala makahatag sang Resolution of No Objection.
Suno kay Silay City Vice Mayor Tom Ledesma, sa karon ginahulat sang konseho ang Resolution of No Objection sang mga barangay nga direkta ma apektuhan sang bulk water project kag ini amo ang mga barangay sang Hawaiian, Guimbalaon kag Kapitan Ramon. Sa bulk water project isa sa mga proposed intake sites kag water treatment sites ang yara sa Guimbalaon.
“To clarify things we are not against it. We just want to be clarified lang”, suno kay Ledesma.
Sa joint statement sang konseho nga ginpa gwa ni Ledesma, pila sa mga pamangkot nga luyag nila masabat amo kun ang proyekto maga apekto sa mga commercial establishment kag factories nga naga salig sang ila nga water supply sa mga suba nga gina propose kuhaan sang tubig sang amo nga project.
Isa pa gid kun bala ma apektuhan man ang agricultural sector sang natungdan nga mga barangay ilakip na ang mga palangitan-an nga naga lakip man sang Hawaiian Sugar Central.
May yara sang application ang Vivant Hydropower Plant nga ang location yara sa Kapitan Ramon, kag luyag man sang konseho mahibaluan kun maapektuhan ini sang proyekto.
Gusto man nila mahibaluan ang posible mangin epekto sang project sa palibot kag kun madayon gid man ano ang benepisyo nga madala sini sa mga Silaynon.
Ginsiling sang Silay City Water District suno sa bise alkalde nga may nagakaigo sila nga supply sang tubig.
Wala nasabat sang mga tiglawas sang proyekto ang ini nga mga pamangkot bangud ang mga nag present sa SP mga katapo sang legal team suno sa iya. Dugang pa niya wala sang pamulitika sa bahin sang konseho.
“We are not privy about this project. (it’s not political vice?) of course not, because we are one here, with this statement, wala political. In fact, we are supportive kay Governor and everything. Ang duties namon about sa welfare – we are representatives of the people. Sa tanan nga na storya namon about this nga may idea abi daw indi gid sila gusto kay number one mamahal ang tubig. Subong nga El Nino kadamo subong technical. Ga study subong amon DRRM, Agriculture and Environment Department in Silay. Kadako gid sang nakita nila nga problema sina kay subong gakulang kami sa bukid man water supply”, suno kay Ledesma.
Damlag pa ginsiling na ni Governor Eugenio Jose Lacson nga ang proyekto bunga sang scientific nga pagtuon kag ang desisyon wala gindali-dali. Pila man ka water summit ang ginsakdag upod sa mga stakeholders nga nagalakip sa mga LGU.