Patay na sang masapwan ang tatlo ka tuig nga bata nga babaye sa Sitio Tikoy-tikoy, Barangay Cabacungan, La Castellana Biyernes sang hapon.
Sa imbestigasyon sang kapulisan, ginbilin ang bata sang ginikanan sini sa iya nga lola nga nagapuyo malapit sa suba. Bangud kay luyag sang bata magpauli sa ila balay, nag gwa ini sa balay sang iya lola kag didto siya naka danlog sa taytay kag na anod sang naga bugusbos nga tubig.
Kapin isa ka kilometro ang kalayuon sang lugar sang insidente sa sa Sitio Obay kung diin nakit-an ang biktima. Gin hingagaw pa dala sa ospital ang bata apang gin deklarar ini nga Dead on Arrival.
Suno sa mga residente sa lugar, delikado ang taytay nga naga angut sang La Castellana kag Moises Padilla. Gani naga pangabay sila nga mabutangan sila sang taytay nga safe nga ma agyan sang mga pumuluyo.