EOC maga recommend nga ang mga naga edad dose anyos pasaka lang nga nabakunahan ang pwede mag caroling.
Sa may dalan Hernaez sa Bacolod City may grupo sang mga kabataan nga naga caroling sa kada mag pondo ang mga salakyan.
Naga pinalapit sila kag mansig mansig bagting sang ila nga mga tansan kag magkanta sang Christmas songs. Kun mag “Go” Na ang traffic light, naga pahigad naman sila para maghulat sa liwat nga pag pondo sang mga salakyan.
Ang iban sa ila naka mask, ang iban wala. Suno sa kay Dr. Chris Sorongon, ang deputy for medical data and analysis sang Bacolod Emergency Operations Center, ila nga ig recommend nga ang mga dose anyos pasaka nga fully vaccinated na amo lang ang tugutan nga maka caroling sini nga paskwa.
Gina tugtan na ang kabataan nga magwa sa idalom sang alert level 2 pero sa pag caroling maga himo pa lang sila sang pagsulundan para diri. Tradisyon na ang pag caroling sang mga kabataan sa kada tiun sang paskwa ugaling may pandemic gani dapat sa gihapon nga mag halong suno sa kay Sorongon.