Region 6 ang naga pangatlo bahin sa performance sa bilog nga pungsod sa nahauna nga adlaw sang vaccination days.
Ini base sa datus sang Department of Health suno kay provincial administrator Rayfrando Diaz. Kag sa amo man nga datus, ang Negros Occidental ang nag panguna sa performance sa mga LGU sa Western Visayas.
Sa November 29, 68,911 ang nabakunahan sang Negros Occidental. 206,615 ang nabakunahan sa Western Visayas.
Sa November 30 naman sang national vaccination days, nagpanguna sa gihapon ang Negros Occidental nga may 58,662 nga nabakunahan. Sa kabilugan, 161,365 ang nabakunahan sa ika duha nga adlaw sa Region 6 sandig sa datus sang DOH.
Sa datus sang Provincial Health Office ang Murcia ang may pinaka madamo nga nabakunahan sang Nobyembre 30 – 10,098. Naga sunod naman ang Cadiz nga may 9,562 nga nabakunahan.
Suno kay Diaz ang pag damo sang mga nag pabakuna tuga sang masupog nga kampanya para sa bakuna kasubong man ang pag damo sang mga nagpang bakuna ukon ang dugang nga deployment sang mga vaccinator, lakip na ang pag lab-ot sang mga target nga mabakunahan. May epekto man diri ang mando sang National IATF para sa mandatory vaccine sa mga naga trabaho on site. Pero suno kay Diaz, sa kabilugan ang pagpabakuna nagapabilin nga voluntary.