Na-intercept sang Philippine Drug Enforcement Agency Regional Office VI – Seaport Inter-Agency Drug Interdiction Task Group ang ₱1.68 million nga balor sang marijuana, kush kag marijuana oil sa BREDCO port sa reclamation area sa Bacolod sang nagligad nga semana.
Suno sa kay Ma. Graziella Tanaleon ang spokesperson sang PDEA 6, ginpadala ang mga kontrabando paagi sa isa ka courier nga nadiskubrehan sang PDEA kun ano ang unod sang package.
Naga unod ini sang 14 ka mga bricks sang mga laya nga dahon sang marijuana nga may kabug-aton nga 14 ka kilo.
Narekober man ang duha ka mga vacuum-sealed plastic bags nga may unod nga kush nga isa ka sahi sang hybrid nga marijuana nga yara sa 8 grams ang kabug-aton.
Dugang pa sina, may 20 ka mga disposable vapes man ang nakuha nga gina-alegar may unod nga marijuana oil.
Padayon ang imbestigasyon sang otoridad agud matumod kun diin halin kag diin i-deliver ang mga kontrabando.
Dugang pa sang PDEA, sa mga pungsod nga legal ang marijuana madata ang pag gamit sang vape nga marijuana oil ang unod kag karon yari naman sa Pilipinas kag ginapasulod sa Bacolod.
Ang amo nga operasyon ang kabahin sang kampanya kontra iligal nga droga sa rehiyon ilabi na ang mga ginapaagi sa Puerto.