Nagpanugyan si Bacolod City Councilor Em Ang, pamuno sang Committee on Health and Sanitation sa publiko nga kun mahimo, ipaiway anay ang mga outdoor activities bangud sa tuman ka init nga panahon.
Dugang sang konsehal, kun indi malikawan nga ma expose sa init, sigurohon nga makainom sang tubig agud makalikaw sa mga masakit tuga sang init. Likawan man suno sa iya ang sobra nga pag-inom sang kape, softdrinks, kag makahulubog nga ilimnon.
Wala paman suno sa iya mga serious cases sang mga masakit bangud sa init ang nakadangat sa mga health care facilities sang siudad, apang padayon ang ila nga monitoring.
Naka alerto naman ang City Health Office kag Disaster Risk Reduction and Management Office agud mag responde sa mga emerhensya may angut sa tuman ka init nga panahon.
“As much as possible, ang aton pwede lang gid mahimo subong is to stay indoors as much as we can. Kun pwede ipaiway ang mga activities nga ara sa gwa, kun mag gwa man gid kita, mag-inom sang madamo nga tubig. Also i-minimize lang anay ang mga caffeinated drinks, coffee, ang mga matam-is nga mga ilimnon, ang mga sweetened drinks, and alcohol”, suno kay Ang.
Sini nga adlaw, yara sa 42 degrees celsius ang heat index sa Negros Occidental lakip na ang Bacolod City kag yara na ini sa “danger” level suno sa PAGASA.
Bangud sini, kanselado man ang face-to-face classes sa halos tanan nga mga eskwelahan sa siudad.
Una na nga ginsiling ni Mayor Greg Gasataya nga naka depende na sa tagsa ka mga eskwelahan kun mag suspend sila sang klase bangud sa mainit nga panahon.
[sibwp_form id=1]