Non-exclusive franchise para sa mga water suppliers ginaduso sa konseho para masolusyunan ang problema sa kakulang sang supply sang tubig. Plano sang Bacolod LGU nga masolusyunan ang kakulang sang water supply sa siudad, ilabi na sa mga barangay nga halos 0-4 hours lang nga may yara sang supply sang tubig halin sa Baciwa – Primewater.
Ginduso ni Councilor Vladimir Gonzalez, pamuno sang Committee on Ways and Means sang konseho nga mapatpat ang mga pagsulundan kag polisa agud matagaan sang non-exclusive franchise ang mga water suppliers nga nagatuyo mag-construct, establish, commission kag operation sang water supply system agud nga masabat ang kakulang sang supply sang tubig sa siudad.
Ginsiling ni Gonzalez nga taliw-as sa ginakabalak-an sang pila ka mga kunsomedor, indi basta-basta ang pagsaka sang bili sang tubig bangud magapabilin ini nga regulated sang National Water Resources Board.
Plano sang Bacolod LGU ang joint venture agreement upod sa interesado nga water supplier, ilabi na sa pagtukod sang intake water pump and filtration system agud nga makakuha sang dugang nga 15-20 million liters a day nga supply sang tubig.