Mga istorya kag litrato sang halit ni Bagyo Odette sa Negros Occidental
Sang Sabado kag Dominggo, ang team sang Digicast Negros nag padulong sa sur kun sa diin tuman ang halit sang bagyo nga Odette.
Ini mga litrato kag istorya na nakuha sang amon team sa pagpadulong sa ini na mga banwa.
Ang ini nga mga photos kuha sa Binalbagan sang Sabado. Pilahay ang mga tawo sa charging stations sa munisipyo kag sa tabok sini. Wala pa sang kuryente sa banwa. Mga puno sang kahoy kag mga nagkalatumba. Mga balay nagkalaguba kag nawad-an atop.
Ang ini nga mga photos kuha sa highway sang Himamaylan City. Kadamo sang mga poste kag puno sang kahoy nga natumba sa dalan. May mga naga pangayo limos sa higad sang dalan. Pati simbahan sa Barangay Aguisan pinpalid man ang atop.
Kuha ang ini nga photos sa Kabankalan City. Mga nagnilupad nga mga atop ang makita sa higad sang dalan. Ang mga commercial establishments nagkala guba. Ang mga baligyaan napuno sang lutak dala sang baha. Wala sang tubig kag kuryente sa siudad.
Sa Ilog, may portion pa sang banwa nga may tubig baha sa gihapon sang Sabado nga hapon. May mga nagaka patyan sang motor kag salakyan samtang naga usoy sa baha. May mga naga hulat sang rasyon sang tubig sa higad sang dalan. Ang mga kable sa higad sang dalan nangin halayan sang basa nga mga bayo. Ang mga popular nga kalan-an sa Barangay Bocana nagkala guba. Wala man sang tubig kag kuryente sa banwa.
Ang ini nga mga photos kuha sa Sipalay City sang Dominggo sang hapon. Maka sulod na ang mga salakyan sa siudad. Wala sang kuryente kag wala sang tubig. Mabudlay pa sa subong ang komunikaksyon. Ilimnon nga tubig, pagkaon, generator set, construction materials kag mga bayo ang gina kinahanglan sang mga pumuluyo. Sa latest nga tally sang CDRRMO as of 4pm, December 19, may 17 ka mga bangkay nga nasapwan kag 17 pa ka mga missing. Gina paabot nga maga saka pa ini kay wala pa nalab-ot ang iban nga mga barangay.