Sa video nga ginhatag sang katapo sang EOC sa Digicast Negros, makita ang pila ka mga customer sang isa ka ilimnan sa dalan Lacson nga makapila man ka beses ginsaway bangud wala nagasunod sa social distancing kag wala man sang suksok nga face mask.
Suno kay Dr. Chris Sorongon, deputy for medical data and analysis sang Bacolod EOC, hugot nila nga ginamonitor ang mga ilimnan bangud kadam-an ang wala nagasunod sa curfew kag sa ginapatuman nga liqour ban.
Suno kay Sorongon sarang mapasirad-an ang isa ka establishiemento komersyal nga wala man nagapatuman sang protocol kun matalupangdan nga kulang sa permit.
Paagi sa katapo sang Task Force Disiplina kag Bacolod City Police Office padayon man ang ila pag-issue sang citation ticket sa mga kalan-an kag ilimnan nga nagasupak sa pagsulundan.
Ang mas ginpabaskog nga tikang ang kabahin sang pamaagi sang EOC agud mapahagan hagan ang pagsaka sang Covid-19 cases ilabi na ang maka-alarma na nga pagdoble sang kadamuon sang Covid-19 related deaths.