Nagpasa na sang ikaduha nga report ang tatlo ka komitiba sang Sangguniang Panlungsod sang Bacolod City tuhoy sa comprehensive review sang mga loans sang siudad sa idalum sang administrasyon ni anay Mayor Alfredo Abelardo Benitez, kahapon nga adlaw.
Sa amo nga report, ginpanindugan sang mga komitiba nga na-audit na sang insakto sang Commission on Audit ang tanan nga proyekto sang siudad sa idalum sang loan kag wala man sang may nakita nga discrepancies sa mga proyekto.
Ini ang rason man suno sa ila kun ngaa wala na ginbaton pa sang SP ang resolusyon ni Councilor Homer Bais nga mag-request sa COA sang special fraud audit tuhoy sa kahimtangan kag pagka delay sang legislative building.
Ginsiling ni Councilor Jude Thaddeus Sayson, pamuno sang Committee on Finance nga indi na kinahanglan pa mag request sang special audit bangud taga tuig, nagapatigayon man sang audit ang COA. Dugang niya, wala man sila sang may ginakahadlokan sa audit bangud klaro man sa 2025 COA audit nga na-examine na tanan nga loan accounts sang siudad.
Nakasaad man sa report sang joint committee nga nagapabilin nga 515 million ang project cost sang legislative building bangud ang 250 million nga dugang kuntani ang wala pa maglabay sa bidding.
Sa 515 million pesos nga project cost, masobra sa 300 million palang ang narelease sa contractor.
Apisar sa pag-adopt sang SP sa amo nga report, para kay Councilor Homer Bais indi siya kumbinsido sa amo nga report.
Suno kay Bais, wala nagasanto ang una nga report sang joint committee ang ang bag-o nila nga report bangud nakasaad sa una nga 765 million pesos ang legislative building apang sa sunod nga report 515 million pesos nalang. Ginakwestyon ni Bais kun ano ang status sang 250 million pesos nga kuntani dugang nga pondo.
Dugang sang konsehal, kinahanglan nga ma-reconcile sang joint committee ang mga numero kag kinahanglan man nga may ipakita sila nga certification sang DBP may angut diri.
[sibwp_form id=1]