Mga ospital sa probinsya sang Negros Occidental sa karon ang gin paidalom sa Code White ukon yara sa heightened alert.
Ini kasunod sang gin-report pag baha sa pila ka mga lugar sa probinsya labi na sa sur nga bahin sang Negros Occidental.
Suno kay Dr. Girlie Pinongan, ang Provincial Health Officer, nalakip sa naka heightened alert ang tanan nga mga health facilities.
Samtang naga abiso naman si Pinongan sa mga pumuluyo labi na ang yadtong naga istar sa flood prone areas nga kun mabunok gid ang ulan, mangita na lang nga daan sang lugar nga mapasiguro nga indi sila mabahaan.
Kun naka ubog na gid man sa tubig baha, gina abisuhan nga mag padulong sa mga health centers agudto mahatagan kag matumar sang doxycycline para malikawan sang temprano ang ano man nga masakit kaangay sang leptospirosis.
Ang mga pumuluyo gina pahalong man sa mga water borne diseases.
Mas maayo nga mapa bukalan ang mga tubig ilimnon para malikawan ang ano man nga masakit nga dala sang kontaminado nga tubig.