Nagkahangawa ang pila ka mga ginikanan sa naglapta nga screenshot sang conversation sa messenger sang isa ka estudyante nga nagaplano magdala sang pusil sa Escalante National High School sa Barangay Alimango, Escalante City.
Gani, nagpasugot ang management sang eskwelahan nga magpauli ang mga estudyante subong nga Lunes, Hunyo 29, basta sila ang pagasugaton sang ila ginikanan ukon guardian.
Samtang, ang mga estudyante nga wala nagpauli, ang nagpadayon lang sa ila nga klase.
Suno kay Police Lt. Col. Florendo Fajardo, hepe sang Escalante PNP, gin-share sang tiya sa social media ang conversation sang iya hinablos kag sang iya playmate sa Roblox nga online nga hampang nga ginkilala kay Jacob, 14-anyos.
Si Jacob ang isa ka estudyante sa Old Poblacion, Escalante, mga 5 kilometers ang kalayuon sa Escalante National High School, base sa istoryahanay nila, plano niya nga magdala sang pusil.
Bangud nagtuga ini sang panic, gin-trace sang kapulisan ang account ni Jacob kag ginpatawag ang iya ginikanan.
Suno kay Jacob, iya ang account sa Messenger apang deactivated na. Iya ginpanginwala nga siya ang naga-chat sa isa ka estudyante.
Ginatun-an na karon sang nagkalain-lain nga ahensya, upod ang chairman sang peace and order, Department of Education, Philippine National Police kag iban pa ang pag-blocklist sang Roblox nga hampang.
Ginalantaw man sang otoridad ang kakulangan sang parental guidance bilang isa sa madamo nga rason kung ngaa may mga nagakatun-an nga violence ang mga kabataan.
Base man sa impormasyon ni alyas “Jacob”, masobra 200 ka mga tawo, iban sa ila mga foreigners, ang ila dungan nga nagakahampang sa Roblox.
Sa announcement Lunes sang hapon, na desisyonan nga ang klase mangin Alternative Delivery Mode ukon ADM until further notice.
[sibwp_form id=1]