Kabankalan City Mayor Benjie Miranda ang maga endorse sa Sangguniang Panlungsod sang recommendation sa pag paidalom sang siudad sa State of Calamity bangud sang RSSI. Ginahatagan man nila sang konsiderasyon mga nagkalamatay nga baboy.
Nagtambong si Mayor Miranda sa RSSI forum nga ginsakdag sang United Sugar Producers Federation ukon UNIFED upod ang Sugar Regulatory Administration sa Nature’s Village sa Talisay.
Sa June 26 nga report sang SRA, sa Negros Island Region may 76,609 hectares sang katubuhan ang apektado sang RSSI.
Suno kay Miranda, ang Kabankalan may 17,595 ka ektariya sang katubuhan. 6,686 hectares diri ang gin-report apektado sang peste nga RSSI. 3,066 hectares ang validated.
Suno sa alkalde sandig sa records qualified na ang siudad mapaidalom sa state of calamity gani siya ang maga endorse sini sa SP.
May mga 200 ka mangunguma ang nagtambong sa amo nga forum sang UNIFED. Suno kay Manuel Lamata ang presidente sang UNIFED ang pag pang-atake sang RSSI isa ka tuman ka seryoso nga bagay kag ang island wide nga problema sarang makapatay sa industriya sang kalamay labi na nga ang Negros naga produce sang masobra sa 60 percent sang kalamaya sa pungsod.
Naga panawagan siya sa mga sugarcane farmers nga mag buligay.
Sa pihak nga bahin, may mga nagkalamatay man nga baboy sa Kabankalan bangud sang masakit. Indi pa mapat-od kun bala kaso ini sang African Swine Fever pero ang sitwasyon ang ginahatagan man ni Miranda sang konsiderasyon sa amo na deklarasyon sang state of calamity.
[sibwp_form id=1]