Sa sulat nga ginpadala ni Provincial Legal Officer, Alberto Nellas Jr. kay Bacolod City Legal Officer Karol Joseph Chiu, gina hinyo sang probinsya nga kakason ang mga vendors nga nagaplastar sa North Capitol Road kon gab-i bangud yara na ang mga ini sa dalan.
Suno kay Nellas, delikado para sa mga motorista kag sa publiko nga maglabay sa amo nga dalan. Isa pa sa mga rason amo ang kahangawa sa seguridad sang mga pasilidad sang Kapitolyo, ilabi na sa Lagoon kag Provincial Treasurer’s Office.
Dugang niya, gina-alegar man nga ang nag-vandalize sa comfort room sang Capitol Lagoon sang nagligad nga binulan, ang mga pamatan-on man nga gikan sa amo nga area.
Hinyo sini sa siudad nga sundon kuntani ang laye nga nagadumili sa mga vendors nga magbaligya sa mga mayor nga alagyan.
Sabat naman ni Chiu, ang pagpahamtang sang mga vendors sa amo nga dalan ang sandig man sa City Ordinance 1009, ukon Vending Ordinance.
Sa walo ka mga vending areas nga nasambit sa amo nga ordinansa, isa ang North Capitol Road.
Nagapangabay naman ang siudad sa mga vendors nga sundon ang oras kon san-o lang sila pwedi makabaligya sa amo nga lugar, sandig sa ila special permit.
Handa man ang Kapitolyo kag ang siudad nga maghinun-anon agud masolusyonan ang amo nga problema.*
[sibwp_form id=1]