Mga proyekto nga pagahimuon para matapna ang problema sa baha indi lang maga halin sa ahensya sang gobyerno, may say na ang nagkalain-lain nga sector pati na ang publiko.
Kun sang una ang Department of Public Works and Highways lang ang naga pat-od kun diin dapat nga mga lugar ang prayoridad sa pagbutang sang proyekto kontra baha, karon gina kuha man ang suhestyon sang publiko pinaagi sa nanari-sari nga sektor.
Ini ang ginpahayag ni Bacolod Rep. Albee Benitez sa pagtakop sang Bacolod Flood Mitigation Summit sa siudad.
Whole of government approach na ang pagahimuon suno sa kongresista.
Tanan nga ahensya kag ang publiko mangin kabahin sang himuon nga solusyon. Suno pa kay Benitez madako nga trabaho ang naga hulat kag indi gilayon matapos pero kun suguran amat-amat ini nga matagaan sang katumanan.
Sa pagtakop sang summit nangin kaupod ang mga ahensya nga naghatag man sang ila commitment para masolusyonan ang problema sa baha.
Gindugang pa ni Benitez nga yara sa P6 billion ang kinahanglanon nga kandtidad para mahimo ang mga projects nga gin suggest man sang mga sector para sa mga barangay pero mangin prayoridad ang Barangay Mandalagan kag Banago bangud ini ang mga barangay nga labing apektado sang pagbaha sa siudad.
Ang flood summit ang ginsuguran sang kongresista sa tunga sang kainiton sang isyu sang korapsyon sa flood control projects sa pungsod.
Gin involve niya ang tanan nga ahensya sang gobyerno pati na pribado nga sector sa pagpangita sang solusyon sa problema sa baha.*
[sibwp_form id=1]