Shadow

Kapistahan ni St. Augustine ginsaulog sang CSA-B

Isa ka institutional mass nga ginapangunahan mismo ni Fr. Arnel Dizon, school president sang Colegio San Agustin Bacolod ang gin-updan sang agustinian community kaina sang aga.

Panugod sang apat ka adlaw nga pista sa pagsug-alaw sang kaadlawan ni Saint Augustine, ang ginkabig doctor of the church sang Roman Catholic.

Magluwas sa mga webinars, outreach activities kag velada ukon mga pagpasundayag, natalana man ang virtual grand alumni homecoming nga pangunahan sang Batch 96.

Kabahin sa selebrasyon ang pagdumdom sang kolehiyo sang mga kadalag-an, mga kultura nga napa-ambit sa mga negrense pinaagi sa catholic education kag evangelization sa sulod sang sisenta na ka tuig.

Natalana man ang paglunsar sang logo and theme sang pagsaulog sang 60th founding anniversary sang CSA-B sa birthday ni St. Augustine sa Nobyembre 13.

Agud mapabaskog pa ang pagpalab-ot sang dekalidad nga edukasyon, ginahanda naman karon sang CSA-B ang mga tikang sa natalana nga pagbalik sang limited face to face classes karon nga pandemic.

Kaina isa man ka vaccination program para sa mga estudyante ang ginpatigayon sa eskwelahan upod sa katapo sang Bacolod Emergency Operations Center.

Sa pihak man sang mga pagtilaw sumugod nga natukod ang CSA-B sang dekada 60, dako ang paglaum sang pamunuan sang eskwelahan nga paagi sa pag-ugyon sang komunidad sarang malampuwasan ang hangkat sang pandemic agud padayon nga mapalab-ot ang regalo sang patron nga si St. Augustine nga amo ang catholic education kag evangelization para sa pumuluyo.

Leave a Reply

Your email address will not be published. Required fields are marked *

Secured By miniOrangeSecured By miniOrange