Masobra sa 200 ka mga LGU sa Pilipinas ang maga pasakop sa Batang Pinoy 2026 sa Bacolod city. Mga accommodation providers ginapangabay nga magkuha sang special permit.
Yara lang kuntani sa masobra 180 ka mga Local Government Units ang ginapaabot nga magapakigbahin sa Batang Pinoy 2026 sa Bacolod City, apang sa karun yara na sa 200 ka mga LGU ang magapasakop sa kompetisyon nga pagahiwaton sa Disyembre 12 tubtob 18.
Ini ang suno sa Philippine Sports Commission.
Ginsiling ni Bacolod City Administrator Atty. Mark Steven Mayo nga magluwas sa nakasulod na nga 200 ka mga LGUs, may yara pa gid dugang nga mga LGUs ang luyag nga magpadala sang ila mga atleta.
Ginapaabot nga yara sa masobra 16,000 ka mga delegates ang magapadulong sa Bacolod para sa Batang Pinoy 2026.
Bangud sini, nagapanawagan na ang siudad sa mga accommodation providers nga wala pa sang mga business permit nga magkuha anay sang special permit para mangin legal kag safe ang ila pag accommodate sa mga atleta nga magapabook sa ila.
Suno kay Mayo, magahatag sila sang listahan sa PSC sang mga accommodation providers sa Bacolod nga may mga permit kag ini naman ang igahatag man sang PSC sa tagsa ka mga LGU nga may mga atleta.
Ini agud malikawan ang posible nga mga scam suno kay Mayo.
Bukas ang siudad sa mga gusto magkuha sang special permit tubtob sa Oktubre 14.
Ginsiling naman ni Bacolod City Mayor Greg Gasataya nga handa na ang siudad para sa pag host sang Batang Pinoy sa Disyembre, kadungan sang Metro Manila Film Festival.
[sibwp_form id=1]