Nakuha sang Gilas Pilipinas Women’s Under 18 ang ika duha nila nga daog sa nagapadayon nga FIBA South East Asian Basketball Association Qualifiers sa STI West Negros University Gymnasium.
Sa una nga duha ka hampang, ginlampaso sang national team ang ila mga pangontra. Sang Martes, gin-dominate sang Pilipinas ang pungsod Vietnam sa score nga 93-42.
Player of the game ang 15-anyos nga si Tiffany Reyes matapos nga naka score ini sang 14 points, 5 rebounds, kag 1 assist.
Nangin daku man nga bulig para sa Pilipinas ang play making sang point guard nga si Zia Jan Oñate. Si Oñate nakakuha sang 7 ka assist, 3 rebounds, kag 2 points.
Siya ang pinakabata sa grupo kag tumandok sang Silay City Negros Occidental.
Sa ikaduha nga hampang sang Gilas Pilipinas sang Miyerkules, ila ginpierde ang Singapore sa score nga 83-53.
Nangin crowd favorite sa amo nga hampang ang Bacolodnon nga si Sophia Dignadice. Nakakuha siya sang 16 points, 5 rebounds kag 7 assists.
Las siete subong nga gab-i, maga-atubang naman ang undefeated nga Gilas Pilipinas sa pungsod Thailand. Magapadayon ang kompetisyon tubtob sa Sabado, Hunyo 6.
[sibwp_form id=1]