
Kaso sang dengue sa probinsya sang Negros Occidental ang nagsaka sa 296 percent.
Sa una nga 18 ka adlaw sang tuig 2025, duha ka dengue related deaths ang na-record.
Ginsiling ni Provincial Health Officer, Dr Girlie Pinongan, nga nagsaka ang dengue cases sa probinsya kun ipaangid sa datus sang 2024.
Humalin sang Enero 1 tubtob 18, 250 ang na report dengue cases.
May pinakadamo nga na record ang siudad sang Bago – 58, naga sunod naman ang San Carlos City – 20 cases, Kabankalan City – 19 cases, Pulupandan – 15 cases, Silay City – 13 cases, Valladolid – 11 cases kag La Carlota City – 10 cases.
Kun ipaangid sa datus sang kasubong nga tion sang 2024, 297.83 percent nga mas madamo ang kaso subong nga 2025.
Kalabanan sa apektado ang yara sa 11 to 20 years old nga age group.
Samtang, sang 2024, sa year end report sang PHO, 22 tanan ang na report dengue related deaths. 6,799 naman ang kabilugan nga dengue cases – 354.48 percent nga mas madamo kun ipaangid sa kaso sang 2023.
Padayon ang kampanya sang PHO sa publiko sa matinlo nga palibot.
Kun nakitaan sang sintomas sang dengue kaangay sang paghilanat sang pila na ka adlaw, palanakit sa kalawasan kag rashes mas maayo nga gilayon mag pa konsulta sa duktor.