Ginpangunahan ni First Lady Louise "Liza" Araneta-Marcos ang pagpanagtag sang ika-duha nga hagna sang libre nga bugas para sa kapin 2,000 ka mga senior citizen sa Bacolod City, Byernes sang aga.
Ini ang kabahin sang Bawat Bayan Makikinabang program sang gobyerno nasyonal nga nagahatag sang 10 ka kilo nga bugas sa mga naga-edad 65 pataas nga wala sang may ginabaton nga social pension.
Sumugod sang Hulyo tubtob sa Disyembre, apat ka beses nga makabaton sang napulo ka kilo nga bugas ang mga benepisyaryo.
Sa iya mensahe, ginsiling sang First Lady nga ini ang inisyatibo sang gobyerno agud masiguro nga ang tagsa ka pamilya may ginakaon.
Dugang sini may mga papremyo man nga gindala si Marcos para sa raffle draw. Lakip na diri ang mga rice cookers, water filters kag televisions.
May 38 man ka mga senior citizen ang nakabaton sang 5,000 pesos nga gift certificate gikan sa talatapan sang First Lady.
Ginsiling naman ni Bacolod City Mayor Greg Gasataya nga halos patapos na ang una nga hagna sang distribution, apang may pila pa ka mga senior citizen ang wala nakakuha bangud kalabanan sa ila wala makahibalo.
Apesar sini, nagpasiguro ang alkalde nga kutob sa may mga pangalan sa listahan, makabaton gid sang napulo ka kilo nga bugas.
Magapadayon ang pagpanagtag sang bugas sa kada Barangay.
Masobra sa 95 million pesos ang pondo nga ginpain sang gobyerno para sa kapin 36,000 ka mga kwalipikado nga benepisyaryo sa Bacolod City.
[sibwp_form id=1]