Madugay na nga gina-monitor sang Land Transportation Office-Negros Island Region ang isa ka shop sa Manuela Building, downtown area sa siudad sang Bacolod, nga gin-alegar naga-print sang peke nga driver’s license.
Ginsiling ni LTO-NIR regional director Jeck Conlu madamo na sang operations ang ahensya sa rehiyon, pati na ang Bacolod Traffic and Transport Management Department nga may nagakadakpan sila nga motorista nga may peke nga lisensya.
Yara sa lima tubtob anum ka mga peke nga driver’s licenses ang nakumpiskar sa mga tinalikdan nga operations sang LTO kag BTTMD, suno kay Conlu.
Nagpatigayon sang surveillance ang LTO upod ang Philippine National Police kung diin naghalin ang peke nga driver’s license kag didto na-trace sa isa ka shop sa Plaza Mart.
Naga-depende ang bayad sa pag-print sang peke nga lisensya sa kadasigon nga makuha ini kag sa kung ano klase ang ginapahimo, kun ini non-professional or professional, ang sukot indi magnubo sa tres mil pesos, suno kay Conlu.
Nagapasalig si Conlu nga magapadayon ang operation batok sa mga naga-obra sang peke nga driver’s license kag sa mga fixers sa sulod kag gwa sang LTO.
Sang 2024, may isa man ka shop sa Plaza Mart ang gin-raid sang otoridad matapos madiskubrehan nga naga printa sang peke nga mga ID kag dokumento sang gobyerno. Isa ang gin aresto kag ginpasakaan sang kaso sang NBI sadto.
[sibwp_form id=1]