
48 ka barangay sa Bacolod ang nakabig red zone kabahin diri ang Brgy. Banago napili nga pilot area para mapabaskog ang kampanya kontra sunog.
Nagalab-ot sa 283 ka mga areas sa Bacolod ang nakabig red zones ukon mga lugar nga ang mga balay kalabanan himo sa light materials, naga ilikit-ikit kag indi mahapos maka-respondi ang mga bombero kun may sunog.
Sa record sang Bureau of Fire Protection-Bacolod, 48 sa 61 ka mga barangay sa siudad ang makabig red zone.
Gani sa pagsinapol sang katapo sang natukod nga Task Force Red Zone nga ginpangunahan ni Mayor Albee Benitez nakasugtan ang paglunsar sang kampanya para sa mapabaskog ang tikang kontra sunog.
Ang Barangay Banago nga isa sa mga red zone area ang napili nga pilot area nga tagaan prayoridad.
Ginsiling ni Councilor Pao Sy, pamuno sang Committee on Fire, Social Defense and Natural Disaster sang konseho, magapatigayon sang profiling ang task force sa mga pamalay sa mga red zone areas para masiguro nga may legal sila nga koneksyon sa linya sang kuryente.
Indi man abi malipod nga kadam-an sa mga kabangdanan sang nagaluntad nga sunog sa mga ginakabig fire prone area ang electrical in nature nga mahimo tuga sang illegal wire connection.
Magluwas sa pagpamutang sang fire extinguishers, maga-train sang katapo sang Community Fire Auxillary Group ang BFP nga makabulig sa tion sang emerhensya.