Nagabug-at sang 250 grams ang nakuha nga suspected shabu sa duha ka babaye kag isa ka lalaki sa sulod sang isa ka hotel sa Goldenfields Commercial Complex sa Barangay Singcang-Airport sa Bacolod, kaina sang aga.
Ang mga gindakop amo sanday alias “Fredo”, 51-anyos, isa ka engineer kag subject sa buy-bust operation, alias “Iya”, 18-anyos, kag alias “Shaba”, 23-anyos.
Suno kay Police Lieutenant Colonel Antonio Benitez, Jr., pamuno sang Bacolod City Drug Enforcement Unit, ginpatigayon ang buy-bust operation bangud sa impormasyon nga ginhatag sang mga pumuluyo nga si “Fredo” ang masami naga-check in sa amo nga hotel kag madamo ini sang nagkalain-lain nga bisita.
Ginsuspetsuhan si Fredo nga nagabaligya sang illegal nga droga, gani gin-validate sang CDEU.
Suno kay “Fredo”, siya ang isa ka rehistrado nga engineer kag naga-ubra sa isa ka kompaniya sa Bacolod.
Ginausisa pa sa karun ang record sang subject sa buy-bust bangud ini ang nagasaylo-saylo sang lugar.
Detained siya sa karun sa isa ka custodial facility kag natalana nga pasakaan sang kaso angut sa iligal nga droga.