Cauayan Mayoral Candidate Jurry Nabaja ang nagpadangat sang disqualification complaint kontra kay Mayor John Rey Tabujara.
Gin-alegar ni Nabaja nga sang Abril 29 sa pag panagtag sang ayuda para sa Senior Citizens sa Cauayan Art Center yara mismo ang alkalde bagay nga isa ka pagsupak sa Omnibus Elections Code in relation to section 30 kag 31 sang COMELEC Resolution 11104 may kaangtanan sa abuse of state resources.
Sa interview iya ginsiling nga gina dumilian ang presensya sang kandidato ukon politiko sa pag panagtag sang ayuda humalin March 28 tubtob May 12.
May tatlo siya ka mga saksi suno sa iya kag may nagakaigo nga litrato kag video bilang ebidensya.
Klaro naman ni Mayor John Rey Tabujara nga naghatag lamang siya sang speech sa amo nga programa.
Pagkatapos sini nag biya siya kag wala na naka tambong sa mismo nga pagpanagtag.
Desperate move na lamang ini ni Nabaja batuk sa iya suno kay Tabujara.
“Pwede ko nila kasuhan kun during the distribution sang kwarta ara gid ko, but nag welcome lang ko to, naghatag message ko, as incumbent mayor. Right after nag gwa ko dayon. (ano ang paglantaw mo sini – filing of case against you, a week before election) Desperado na. Pierde na guro”, suno kay Tabujara.
Personal nga nagpadulong sa talatapan ni Provincial Elections Supervisor Ian Lee Ananoria si Nabaja.
Gin-abisuhan siya nga direkta na nga magpadangat sang reklamo sa Committee Kontra Bigay. Ini ang komitiba nga in-charge sa ano man nga sahi sang reklamo kontra vote buying, vote selling kag abuse of state resources.
Suno kay Atty Jossil Macute ang Assistant Regional Director sang COMELEC NIR, tatlo ang sarang nga mapatuman sang komitiba.
Una kun may nakit-an nga balasehan sa reklamo, iga forward sang komitiba ang complaint sa COMELEC Law Department, ika duha kun may nakita man ini nga balasehan pero may mga luyag pa nga ma klaruhan, iga refer ini sang komitiba sa Regional Kontra Bigay kag ikatlo kun wala sang balasehan iga dismiss ang amo nga reklamo.
Suno kay Macute, nagdamo karon ang disqualification complaint nga napadangat sa talatapan sang COMELEC kasunod sang aksyon nga napatuman sang ahensya sa mga reklamo.
Seryoso ang COMELEC sa amo nga mga kaso, kag bisan pa nga natapos na ang pinilay sarang mapatuman ang ano man nga desisyon angut sa disqualification case.