Shadow

Budget indi mapasar sa banwa sang Moises Padilla kay may mga konsehal nga wala naga tambong sa session

Ginadihon nga 2022 proposed annual budget sang banwa sang Moises Padilla ang ginakabalak-an nga indi mapasar bangud kulang ang katapo sang konseho.

Nagalibog karon ang ulo ni Moises Padilla Mayor Ella Garcia-Yulo kun paano ipasar ang ila natalana nga 2022 proposed annual budget bangud lima sa katapo sang konseho, nalakip na diri si Vice Mayor Ian Villaflor ang indi makatambong sa session.

Si Villaflor kag ang tatlo pa ka mga Sangguniang Bayan member nga sanday Jimmiedon Plaza,
Morito Flores kag Vincent Garcia nga hinablos sang alkalde ang separado nga yara sa custodiya sang National Bureau of Investigation kag PNP matapos mag-surrender sa ginapangatubang nga murder case.

Ini may angut sa pagpatay sa isa man ka konsehal sang banwa sang 2019.

Si SB Member Fred Bangcaya ang nagfile man sang indefinite leave kag karon at large bangud sang kaso nga rape.

Setyembre pa sang naghinyo sang panugyan ang alkalde gikan sa Department of Interior and Local Goverment matapos wala na makatambong sa session sang Sanggunian ang apat ka mga katapo sang konseho, nalakip na ang bise alkalde sang banwa.

Suno sa alkalde, magluwas nga apektado karon ang pagpalab-ot sang basic services sa pumuluyo mahimu maapektuhan man ang ila mga natukod nga programa ilabi na bahin sa Covid-19 response sa madasun nga tuig kun magapabilin nga wala sang quorom bangud anum lang ang nabilin sa katapo sang Sanggunian.

Leave a Reply

Your email address will not be published. Required fields are marked *

Secured By miniOrangeSecured By miniOrange