Naka-byahe pa kaina sang aga ang isa ka fastcraft vessel halin Bacolod pa Iloilo.
Pero las onse sang aga, wala na gintugutan sang Philippine Coast Guard – Bacolod ang byahe sang tanan nga passenger vessel nga nagabyahe Bacolod-Iloilo-Dumangas vice versa sang ginpaidalom sang pag-asa ang bilog nga isla sang Negros sa Tropical Cyclone Wind Signal No. 1.
Suno kay Chief Petty Officer Louie Campaner,commander sang PCG-Bredco sub station, ila na ginpanugyan sa mga tagdumalahan sang mga shipping lines nga makig angut sa ila agud matugutan ang mga passenger vessel nga makapangita gilayon sang shelter.
Nauna na nga gin suspend sang Coast Guard ang byahe sang mga sakayan nga nagabyahe padulong Cebu sa port sang Escalante, Sagay kag San Carlos City bangud man ginpaidalom man sa Signal No.1 ang Cebu tuga sang Bagyo Odette.
Sa Negros Oriental, ginsuspended man sang coast guard ang byahe sang mga sakayan padulong Cebu kag Zamboanga del Norte.
Ang Negros Occidental ang isa sa mga probinsya nga gindala sa storm surge warning. Gina paabot nga yara sa isa tubtob duha ka metros ang kataason sang storm surge sa baybayon sang probinsya.
Gani wala na gina pahanugutan ang ano man nga sahi sang sakayan nga maka biyahe sa baybayon.