Nakaangkon sang mga seryoso nga pilas ang mag-amay matapos sila ang ginpanghanot sang steel baseball bat sa Brgy. Poblacion 1, Sagay City, mga pasado la-una sang hapon sang Martes, Hunyo 9.
Yara karon sa ospital ang mga biktima nga sanday alyas “Eva”, isa ka business owner kay ang iya senior citizen nga amay. Sila ang ginpaidalum sa surgery bangud sang ila naangkon nga mga injuries.
Naggwa sa imbestigasyon nga nagalalisay sanday Eva kag ang suspek nga si alyas “Onel”, 47-anyos sang nagkuha ang suspek sang baseball bat kag makapila ka beses nga ginhanot ang biktima sa ulo.
Sang makita ini sang amay sang biktima, siya ang nagtinguha nga magtambag apang ginlampusan man sang suspek gamit ang baseball bat sang makapila ka beses.
Nagbulig ang miyembro sang duha ka pamilya agud ma-restrain ang suspek nga karon detained sa Sagay PNP.
Ginsiling ni Police Lt. Col. Alvimar Flores, hepe sang Sagay PNP, indi pag-intyendihanay kag kainit ang ila nakita nga mga motibo sa insidente.
Kaso nga Violence Against Women and Their Children kag frustrated homicide ang ginpasaka batok sa suspek.
“May mga misunderstanding sila sang iya nga partner and na-istorya ko man personally ang suspect, according sa iya, nasupot guro nga mga kaakig and daw wala niya na mapunggan ang iya kaugalingon but despite that, naghinulsol man siya. Bisan papano ginhambalan ko man siya nga, biskan amo na ang natabo, mangayo siya pasensya sa iya partner kag sa pamilya,” pahayag ni Lt. Col. Flores.*
[sibwp_form id=1]