Gin-aresto sa iya balay sa Barangay Taclobo sa Dumaguete City sang kahapon si anay Negros Oriental Governor Pryde Henry Teves bangud sa kaso nga paglapas sa Terrorism Financing Prevention and Supression Law .
Ang arrest warrant ang gin-issue sang Regional Trial Court Branch 74 sang Cebu City ni Judge Marlon Moneva. Suno kay Police Major Nazarino Emia, hepe sang CIDG Negros Oriental, gintugutan sang korte nga makapiyansa sang P600,000 si Teves para sa 3 counts sang iya kaso.
Nagpiyansa siya sa RTC Branch 40 sa idalom ni Executive Judge Gerardo Paguio, Jr.
Dugang pa sang CIDG nga si Teves ang nagpadulong sa ila talatapan sang mahibaluan nga gina pangita siya sang mga pulis kay may warrant of arrest siya.
Si Pryde Henry ang utod ni anay Negros Oriental 3rd District Representative Arnolfo Teves, Jr. nga yara man sa karon kustodiya sang otoridad sang Timor – Leste.
Gindeklarar sang Anti Terrorism Council ang nag utod nga Pryde Henry kag Arnolfo, Jr. bilang mga terorista bangud sang ila mga kahilabtanan sa pila ka murder cases sa probinsya sang Negros Oriental.