Apat ka mga persona ang biktima sang pagpaniro sa Sitio Cang-alaw, Barangay Buenavista sa banwa sang Santa Catalina, Negros Oriental, kaina sang kaagahon.
Ginklaro sang PNP nga duha ang patay kag duha ang nasamaran sa nagluntad nga shooting incident, taliw-as sa una nila nga ginpagwa nga report nga tatlo ang napatay.
Ginsiling ni Capt. Stephen Jaynard Polinar, spokesperson sang Negros Oriental Police Provincial Office, nga nakaluwas ang ikatatlo nga biktima.
Yara sa nabukid nga bahin ang lugar sang krimen kag may kalayuon ini sa proper sang banwa.
Ang mga biktima, nga taga Brgy. Mansagumayon sa Santa Catalina, mga manug copra sa lugar.
Base sa inisyal nga imbestigasyon, yara ang mga biktima sa payag sang nag-abot ang duha ka mga armado nga lalaki kag nagsugo sa ila nga baklan sila sang ilimnon.
Nagpamalibad ang mga biktima tungod wala sila sang kwarta. Ginbaligyaan sa ila sang mga armado ang ila nga mga pusil kag sang nagpamalibad ang mga biktima nga baklon ini, ginpa-arakan sila tiro.
Gina-usisa pa sang PNP ang motibo sa pagpaniro apang base sa pila ka reports, may daan na nga indi pag-intyendihanay ang mga biktima kag ang mga suspek bangud sa away sa boundary sang duta.
Nakilal-an naman sang kapulisan ang duha ka mga suspek nga mga residente sang Brgy. San Isidro sa banwa sang Pamplona.
[sibwp_form id=1]