Isa ka pasahero nga kuntani magapadulong sa Bacolod kag isa pa gid nga nag-abot sa siudad sang Sagay ang nadakpan nga nag gamit sang peke nga vaccination certificate.
Suno kay provincial administrator Rayfrando Diaz ang pasahero nga maga padulong kuntani sa Bacolod ang wala nadayon sa iya nga biyahe matapos ini nga madakpan nga nag gamit sang peke nga vaccination certificate sa iya nga pag apply sang S-Pass, samtang ang nagpadulong naman sa Sagay nga nagbiyahe paagi sa barko ang gin quarantine.
Ang natungdan suno kay Diaz ang wala sang S-Pass. Wala naga require ang Bacolod sang S-Pass sa kuntani fully vaccinated.
Pagkatapos sang quarantine period, ini siya ang iga test kag ang natungdan ang maga bayad sa gasto para sa amo nga test suno kay Diaz.
Ginatun-an sang probinsya ang legal action batuk sa duha.
Nagapabilin ang policy sang Negros Occidental sa pag require sang tanan nga maga padulong sa probinsya sang S-Pass lakip na ang padulong sa Bacolod bisan pa ang siudad ang may EO na nga wala naga require sang mga nabakunahan sang S-Pass.
Ang amo nga pamaagi suno sa probinsya ang mas naga pahapos sang pag verify sang mga dokumento sang mga pasahero. Kun may naga issue man nga may lamod pulitika ang amo nga tikang suno kay Governor Eugenio Jose Lacson indi naman nila mapunggan ang kasubong nga mga opinyon.
Kun nagapanawagan ang Bacolod sang kuntani respeto amo man ini ang panawagan sang gobernador. Suno kay Lacson, wala man gani nagapasilabot ang Negros Occidental sa mga patakaran sang siudad sa mga major ports nga nahamtang sa Bacolod.