May isa ka taga banwa sang Murcia nga manug siyento dies anyos nga lola posible nga amo na ang pinaka tigulang nga persona sa Negros Occidental.
Sa proseso sang pag hatag sang bulig sa mga centenarians ukon ang mga naga edad sang one hundred years old pasaka, nakilala sang lokal nga panguluhan ang manug siyento diyes anyos nga si Lola Concepcion Lauron sang Barangay Damsite.
Alerto kag maka bati sa gihapon si Lola Concepcion. Ginbisita siya ni Mayor Gerry Rojas kag iya gin kantahan ang alkalde sang dumaan nga Hiligaynon nga kanta.
Ginsiling sang centenarian nga pagkaon sang isda, prutas kag utan ang iya sekreto sa malawig nga pangabuhi. Wala siya naga kaon sang processed food kag canned goods.
Sa December 8 maga saulog sang iya nga 110th birthday si Lola Concepcion, ang adlaw sang kapistahan man sang banwa. Ang iya ngalan gikan sa feast day sang Immaculate Concepcion.
Ang lokal nga panguluhan sang Murcia ang naga hatag sang diyes mil pesos nga cash assistant sa mga naga lab-ot sa one hundred years old kag singko mil pesos nga balor sang groceries.
Sa pagtaliwan ni Lola Francisca Susano sa edad nga 124 years old, posible suno sa Murcia LGU nga si Lola Concepcion na ang pinaka tigulang nga persona sa Negros Occidental.