Napulo sa 19 ka mga napatay sa encounter sa Toboso sang Domingo ang nakilal-an na.
Pila naman ka mga grupo ang naga panawagan sang hustisya.
Ang University of the Philippines Diliman University Student Council ang naga panawagan sang Hustisya para kay Alyssa Alano nga isa sa 19 nga napatay. Siya ang councilor sang UP Diliman Student Council kag Presidente sang League of Filipino Students – UP Diliman. Sa April 23 nga post nila nakasaad nga student leader, researcher, aktibista kag isa ka organizer si Alyssa. Yara siya sa Toboso para matun-an ang sitwasyon sang apektado nga komunidad suno sa post.
Isa man sa 19 nga napatay si RJ Nichole Ledesma nga isa ka writer kag editor sang Paghimutad – Negros Island Alternative Media. Graduate siya sang University of St La Salle Bacolod kag nag serbe man sadto nga editor-in-chief sang school publication. Katapo man siya sang League of Filipino Students.
Sini nga Abril 23, sa pahayag sang Police Regional Office NIR, tigayon naman nakilal-an ang duha pa gid sa 19 – ang 18 anyos nga si Joros Caramihan sang Don Salvador Benedicto kag isa ka 17 anyos nga menor de edad nga taga Escalante City. Na-release nga ang ila nga bangkay sa ila pamilya.
Sang April 22, ginkilala na sang PNP sanday Rene Villarin Sr., nga kilala man bilang si Alyas Kumander Pikot, 58 anyos, Roger Fabillar Tapang, alyas Jhong, alyas Arnel, 36 anyos sang Toboso, Ruel Sabillo, 19 anyos sang Toboso, Sonny Boy Caramihan, 28 anyos sang San Carlos City, Pedro Bonghanoy, 32 anyos sang Escalante City kag Arnel Javoc, 32 anyos sang Calatrava.
Gin-report man nga may duha ka mga lalaki nga foreign national sa mga napatay, pero suno sa Army tubtob sa karon wala man may nag-claim sang bangkay sang duha gani indi man mapat-od kun ano ang ila nga nationality.
Ang Apolinario Gatmaitan Command sang New People’s Army ang naga hatag sang ila sini pinaka mataas nga tribute sa ila gina kabig martys sang Barangay Salamanca sa Toboso. Ang ila mga ngalan ang ma pagkit na sa madugay na nga away kag pag pakigbato para sa duta kag hustisya sa isla suno sa ila. Indi tanan suno sa rebeldeng grupo mga revolutionary fighters. May mga sibilyan kag mga local kag foreign journalist kag human rights advocates.
Sa pahayag naman nga gin pa gwa sang militar ginsiling ni Col Louie Dema-ala ang spokesperson, ang ano man nga pag ka utas sang kabuhi ang maka alarma kag dapat nga usisaon. Isa mga pamangkot nga dapat sabton amo kun ngaa yadto ang mga natungdan mismo sa encounter site, armado kag nagabalos palupok sa mga soldado. Ini nga bagay suno sa militar ang indi ma balewala. Sila ang nagsunod sa International Humanitarian Law.*
[sibwp_form id=1]