Gin-report sang Police Regional Office Negros Island Region, nga ila nadakpan ang lima ka gina-alegar miyembro sang New People's Army sa dalan Circumferential, Barangay Matab-ang sa Talisay City, Miyerkules sang gab-i, Abril 22.
Ginkilala sang Criminal Investigation and Detection Group nga sanday:
Glenmar Bacusmo, 48-anyos, residente sang Ipil sa Zamboanga Sibugay, gin-alegar squad leader sang North Negros Front kag alyas Danny Boy Baguio, 25-anyos, taga Brgy. Buenavista sa Himamaylan City, squad leader sang Central Negros 2.
Ang tatlo ka iban pa nga gin-aresto amo sanday Judy Caramihan 34-anyos, taga Brgy. Bagonbon sa San Carlos City; Julie Ann Balora, 26-anyos, taga Brgy. Santa Rosa sa Murcia kag Jerome Seballos 57-anyos, taga Brgy. Bata sa Bacolod City.
Si Bacusmo ginakabig Rank 2 Regional Most Wanted Persons para sa mga kaso nga theft, robbery, multiple frustrated murder, multiple murder, crimes against Humanitarian Law, genocide kag iban pa nga crimes against humanity kag attempted murder.
Suno sa PRO-NIR, samtang gina-serbe sang mga operatiba ang warrant of arrest kay Bacusmo para sa kaso nga attempted murder, ila man nadakpan ang apat ka iban pa nga mga persona bangud sa paghupot sang firearms kag explosives. Pila sa ila ang may mga pilas pa sa lawas.
Ginpahayag sang otoridad nga ang mga nadakpan ang imbulbado sa nagluntad nga engkwentro sa Barangay Salamanca sa banwa sang Toboso sadtong Domingo, apang sila ang nakapalagyo.
Narekober sa mga nadakpan ang apat ka mga pusil, mga bala kag granada.
Ginpangunahan ang nasambit nga operation sang Regional Intelligence Division sang PRO-NIR, upod ang Criminal Investigation and Detection Group-NIR, Regional Mobile Fore Battalion, Philippine National Police Special Action Force, Talisay PNP kag 79th Infantry Battalion.*
[sibwp_form id=1]