Pasado la una y medya sang kaagahon Huwebes nga adlaw sang may nabatian ang mga pumuluyo nga naglagabong sa bahin sang Taytay Mambucog, Brgy. Zone 16 sa Talisay City.
Ila ginlantaw sa bintana, wala sila sang may nakita, gani wala na sila nagpang-usisa pa.
Sang nagsanag na, mga las 6 sang aga, pila ka mga commuters ang naglabay sa area kag nasapwan ang isa ka persona nga nagahamyangon sa dalan.
Ginkilala ang biktima nga si Ralphie Rayo, 41-anyos, isa ka freelance photographer kag drone pilot.
Ginsiling ni Police Lt. Ana Rose Duca, deputy chief for administration sang Talisay City PNP, naghalin sa Bacolod City ang rider kag papauli na kuntani sa Silay City sang siya ang nakabunggo sa pang-ulihi nga bahin sang pickup nga naka-park sa higad sang dalan.
Suno kay Duca, madugay na nga naka-park ang nasambit nga pickup sa lugar bangud nga ginakay-o ini.
Gindeklarar nga dead on arrival si Rayo sa Talisay City Health Center.
Ginguyod ang pickup truck pakadto sa Talisay PNP kag nagpasalig ang tag-iya nga magahatag siya sang financial assistance sa pamilya sang nagtaliwan nga freelance photographer.*