Para sa mga frontliner sa gihapon ang nag abot nga Sinovac vaccine sang Lunes nga adlaw.
Suno kay Negros Occidental Governor Eugenio Jose Lacson, mga barangay health workers tubtob sa mga medical health unit sang kada LGU ang pagadapatan sang bag-o nga batch sang bakuna. Kun matapos na sila amo ang pag dapat naman sa mga indigent nga senior citizen.
Dala ni anay congressman Albee Benitez sa iya nga private plane kahapon ang 11,400 ka Sinovac vaccine para sa Negros Occidental kag 3,000 para sa Bacolod City, gikan sa Department of Health-Manila.
May natalana pa gid nga maga abot nga bakuna suno kay Benitez.
Iya ginsiling nga nag offer siya nga dal-on ang bakuna agud to mas madasig ini nga mabaton sang probinsya kag sang siudad.
Suno sa iya sa nagligad may vaccine allocation para sa negros nga ginhatag sa iban nga probinsya sa Western Visayas.
Samtang, suno kay Lacson katunga lamang sa nag abot nga bakuna ang igadapat bangud ang katunga ang ipabilin para naman sa second dose.