Forza Development Corporation ang magapatukod sang Waste to Energy facility sa sulod sang Bacolod Integrated Recycling and Technoloy Hub ukon BIRTH sa Barangay Felisa, matapos nga ini ang nagdaog sa bidding sang siudad.
Ang FDC ang sister company man sang garbage collector kag sang nagadumala sang sanitary landfill sang siudad nga International Solid Waste Integrated Management Specialists, Incorporated ukon ISWIMS.
Ginsiling ni Atty. Joseph Karol Chiu, ang City Legal Officer sang Bacolod nga ini ang una nga tikang sang siudad sa pagpatuman sang WTE. Ginabulubanta nga 4 billion pesos ang kinahanglan sang isa ka pribado nga kompaniya agud tigayon nga makapatukod sang isa ka planta.
Sandig sa resolusyon nga ginpasa sang Sanguniang Panlungsod sang Bacolod, magabayad sang renta ang amo nga developer samtang nakatukod ang ila nga pasilidad sa sulod sang BIRTH.
10 pesos per square meter ukon 1 million pesos per year ang ila nga bayaran sa siudad sa malapit 10 ka hektareya nga duta sa Barangay Felisa. Magluwas sini, may porsyento man nga makuha ang siudad sa income sang developer kada tuig.
Ginklaro man ni Chiu nga ang developer ang may ara na sang pre-qualification certificate gikan sa Department of Energy, rason nga kon mapirmhan na ang kontrata kag indi nila matuman ang pagpatindog sang WTE, sarang sila nga mahatagan sang penalidad.
Ang waste to energy ang isa ka inisyatibo sang DOE kun sa diin ang mga basura gikan sa sanitary landfill ang sarang ma convert bilang kuryente.
Kun tigayon na nga mapatuman ang amo nga inisyatibo, ang Bacolod City ang mangin pinakauna nga siudad sa bug-os nga pilipinas nga may WTE facility.*
[sibwp_form id=1]