2.3 million pesos nga balor sang veterinary facilities kag mga kasapatan ang gin-turn-over sang Martes sang probinsya sa mga benepisyaryo sini.
Ang former rebel nga si Ka Aya nga sadto nagserbe nga political officer sang rebeldeng grupo ang naga pasalamat sa bulig nga napa ambit sa ila sang gobyerno probinsyal.
Suno sa iya ini pamatuod nga may kabalaka ang gobyerno sa ila.
Katapo siya sang grupo nga ginabuligan sa idalom sang 303rd Brigade sang Philippine Army kag nahatagan sila sang baka para fattening.
Suno kay Provincial Veterinarian, Dr Placeda Lemana, ang grupo nila isa lamang sa mga nagbaton sang kasapatan para sa breeding kag livelihood.
Nalakip sa ginpanagtag ang mga baboy. May siyam man ka units sang dummy sow para sa artificial insemination sa idalom sang Provincial Animal Genetic Improvement Program.
Gin-release man ang napulo ka units sang motorsiklo para sa Provincial Animal Biosecurity Program.
Ini ang naga balor sang 1.9 million pesos.
Pahanumdom ni Governor Eugenio Jose Lacson nga ang mga motorsiklo para sa hilikuton angut sa ila trabaho kag indi sa personal nga gamit.