Mayor Albee Benitez ginatun-an ang posible pagpa-isol sang opening salvo tungod sang gina-forecast sang PAG-ASA nga maulanon sa pagsugod sang local campaign period.
May nasiplatan nga low pressure area ang PAGASA sa East sang Southeastern Mindanao sang Martes nga sarang magtuga sang pag-ulan sa madasun nga inadlaw asta sa weekend.
Gani ginatun-an ni Mayor Albee nga kun may dako nga posibilidad sang pag-ulan sa pagsugod sang local campaign period mahimo ipaisol nila ang natalana nga grand opening salvo sang Asenso Bacolod sa Marso 28.
Ginapaabot sang alkalde ang linibo nga mga supporters nga magadagsa sa Paglaum Sports Complex.
Indi pa mapat-ud kun sin-o ang magabisita kag maga-upod sa rally.
Pero sa naandan may mga performers nga imbitado para maghatag kalingawan sa pagtililipon.
Samtang, nagpahanumdom liwat ang alkalde sa mga supporters nga dapat mangibabaw ang kalinong sa tion sang kampanya asta matapos ang election period.