Department of Education ang naga pahanumdom nga dapat ang mga graduation kag moving-up ceremonies ang mangin simple pero mangin makahulugan.
Karon nga election season na, gina pahanumdom man ang mga empleyado sang DepEd – teaching kag non-teaching nga likawan ang electioneering kag partisan politics.
Suno kay Ian Arnold Arnaez ang spokesperson sang DepEd Negros Occidental Division, April 14 and 15 naka schedule ang graduation kag moving up exercises, pagkatapos sini opisyal na nga magatakop ang School Year 2024-2025.
Gina patuman sang DepEd ang no collection policy. Wala na sang gastuhan pa ang mga ginikanan may kaangtanan sa sini nga ceremonies bangud na sakop na ini sa Maintenance and Other Operating Expenses.
Ginsiling man ni Arnaez nga gina haylo ang pag agda sang yadtong maka hatag sang insipirasyon sa mga estudyante bilang speakers kag likawan ang pag agda sang mga naga papili sa sini nga election.
Kun indi malikawan ang mga incumbent officials nga mag tambong, limitahan na lamang ang ila nga speaking engagement ukon mag tutok dapat sila sa tema.
“Ang division kag ang department naga insist lang nga ang aton imbitaron during the graduation and recognition rites ang mga maka inspire sa aton moving up learners, mga graduates, rather than political figures nga mangampanya man lang sa mga parents nga maga attend. So we have to stick to that”, suno kay Arnaez.