Probinsya sang Negros Occidental ang nag pain sang 50 milyones pesos nga pondo bilang bulig para sa mga nagub-an kag nadulaan sang puluy-an bangud sang bagyo Odette.
Ang supplemental budget kadungan nga gin pasar sang sangguniang panlalawigan kahapon sa pag paidalom sang Negros Occidental sa state of calamity.
Suno kay provincial administrator Rayfrando Diaz, ang pondo panugod nga bulig kag natalana nga iga bakal sang GI sheets para sa mga nagub-an ukon nawad-an sang balay.
Sa 8am December 22 nga report sang Provincial Disaster Management Program Division naman, 42,432 ang totally destroyed houses kag 159,832 ang partially damaged nga balay.
Suno kay Diaz maga counterpart ang tagsa ka LGU bahin sa pag hatag sang bulig sa mga nawad-an sang balay. Samtang, ang Department of Trade and Industry naman ang maga monitor bahin sa presyo sang mga balaklon kadungan sang pagpatuman sang price freeze sa mga basic commodities.
Suno kay Diaz wala na diri nalakip ang mga commodities nga masami naga saka gid man sang presyo sa bulan sang Disyembre. Isa ka relief operation center ang ginpahamtang na sang probinsya agudto mangin masulhay ang pagbaton kag pagdul-ong sa mga relief goods sa mga lugar sa sur nga bahin sang Negros Occidental.
Tubig ang isa sa labing kinahanglanon sa karon sang mga apektado labi na nga wala pa sang available nga refilling station sa amo nga mga lugar.