Shadow

Mga residente sa Purok Luhod-Luhod sa Mandalagan nagahingyo nga matagaan sang permanente nga water supply

YouTube player

Ginpang butangan sang signage ang onse ka mga bubon sa Purok Luhod-Luhod sa Barangay Mandalagan sa Bacolod nga indi anay makuhaan sang tubig sa sulod sang 24 oras kay ginbubu-an sang chlorine.

Gani ang mga pumuluyo nag hingagaw na nga daan stock sang tubig, ang iban nagpa deliver sang purified water.

Pero para sa anay purok chairman nga si Norberto Togores, temporaryo lamang nga solusyon ang pagbutang sang chlorine sa bubon. Ang kinahanglan nila, permanente nga solusyon. Pangabay nila nga mabutangan sang linya sang baciwa primewater para may access sa matinlo nga tubig kag mapalayo sa balatian.

Bangud wala sang water supply, mansig mansig pakutkot sang bubon ang mga residente. Wala naman sila kuno sang iban nga choice sang sa ma antos sila nga wala sang tubig sa pang adlaw adlaw.

May mga tubo sila nga naga angut sa bubon pakadto sa ila nga mga balay. May mga proseso na sila nga ginahimo para masiguro nga matinlo ang tubig nga ila gina gamit sa pag hugas sang ila nga mga pinggan kag baso.

Miyerkules sang gab-i nagwa ang resulta sang laboratory test nga positibo sa cholera ang water sample gikan sa isa sa mga bubon sa amo nga purok. May isa man ka confirmed case sang cholera sa Mandalagan.

Pagkabati sang iban nga residente sang balita, puro purified water anay ang ila gina gamit pati sa pagpang hugas.

Kahapon nagpanagtag man sang mga bag-o nga water container ang barangay sa mga residente.

Panawagan nila sa lokal nga panguluhan sang Bacolod, kun tani masugilanon ang Baciwa para matagaan sang permanente nga solusyon ang ila nga problema.

Secured By miniOrangeSecured By miniOrange