27 ka mga fruit vendors nga napilian sa raffle ang kuhaan sang pwesto kun indi pa magsaylo sa sulod sang merkado sa Marso 6.
Gindayon sang siudad ang pagpa-raffle sang mga stall sa Libertad Market annex building para sa 27 ka mga fruit vendors bisan nagka-tensyon sa merkado sang nagligad nga bulan. Pero asta subong wala gihapon nakasaylo sa ila mga pwesto ang mga napilian sa raffle kag sa baylo nagapadayon sila baligya sa gwa sang merkado.
Suno kay City Legal Officer Romeo Carlos Ting, Jr., nga kun indi pa mag-amat amat saylo ang mga vendors antes sang Marso 6 mapilitan sila nga ihatag na lang sa iban nga interesado ang ila mga pwesto. Ginsiling naman sang pila ka mga fruit vendors nga wala sila nagsulod sa ground floor sang annex building bangud may nagabaligya pa nga fruit vendors sa gwa sang merkado.Gani ang katapo sang City Legal Office enforcement team ang natalana man nga magapatuman sang clearing operation batuk sa mga fruit vendors nga nagabaligya sa kilid sang gutter sang merkado.
Samtang, ginsiling man ni Ting nga padayon gihapon ang validation sang masterlist sang vendors sa Libertad Market agud masigurado nga lehitimo ang sarang matagaan sang pwesto sa sulod sang merkado.