Shadow

Mga manugbaligya sa Libertad Market nagalaum nga amat-amat makabawi

Humalin sang Agosto, bag-o lang naka bukas sa adlaw sang Domingo ang tatlo ka mga dalagko nga merkado sa Bacolod.

May pila ka mga vendors ang nag abi-abi sang liwat nga higayon nga maka baligya sa adlaw nga masami gina dagsa sang naga panindahan.

Sa Libertad South Public Market, ang dry goods vendor nga si Gevelyn Valenzuela nagsiling nga may mga nagbakal gid man sa iya sang temprano pa. Pero sang maabtan sang Digicast Negros mga alas onse sang aga iya na lamang gina hulat ang iya nga kabulig para maka panira na siya.
Wala na sang bumalakal suno sa iya.

Ang mga manugbaligya naman sang karne sa sulod sang merkado nagsiling nga tuman man ka hina sang baklanay.

Pila man abi ka Domingo suno sa ila nga sirado ang merkado kag ulihi na man lang napahibalo ang publiko nga liwat maga bukas ini, gani posible wala nakahibalo ang mga bumalakal nga liwat na nagbukas ang mga baligyan.

Madamo pa sang bilin sa ila nga mga karne ang iban gani nila nga mga kaupod nga nagabaligya wala anay nagbukas subong nga Domingo suno sa ila.

Ang manugbaligya sang bulak nga si Jimbo Apolinario naman, pagkahibalo nga liwat maga bukas ang merkado sa Bacolod nagpasimpalad.

Suno sa iya maayo na man lang nga may nagbakal sa iya.

Sang tion nga sirado ang mga merkado nagtenir lamang siya sa ila lugar sa Murcia kag didto nag tinguha sang kun ano ang sarang nga makitaan.

Pigado man suno kay Apolinario pero siya ang nagalaum nga sa indi madugay mangin maayo ang baklanay, ilabi na nga nagahilapit ang pista minatay kag bisan paano magatinguha ang kadam-an sa pagbisita sang ila nga minatay sa bisan sa lain na nga petsa.

Ginmando ni Mayor Evelio Leonardia ang pag-lift sang Sunday lockdown sa Libertad, Burgos kag Central Market sumogod subong nga Domingo.

Iya ginsiling nga ang resulta sang surveillance testing nagapakita nga indi na kinahanglanon ang pagpasira sang mga merkado.

25 sa 1,665 nga mga vendors nga gin-swab sa una nga adlaw sang testing ang nagpositibo sa virus. Nagakasayuran nga 1.5% ang positivity rate.

Ginahulat pa ang resulta gikan sa ika duha nga adlaw nga testing.

Secured By miniOrangeSecured By miniOrange