Ginpamatukan sang mga residente sang Barangay Felisa sa Bacolod City kag sang mga environmentalist groups ang plano nga pag-ula sang residual waste sang Victorias City sa Sanitary Landfill sang Bacolod.
Sang Doming, Hulyo 5, ginpangunahan sang Negrosanon Initiative for Climate and the Environment ukon NICE kag sang Sanguniang Kabataan sang Barangay Felisa ang isa ka public consultation nga gintambongan sang kapin isa ka gatus ka mga residente.
Isa sa mga gintalakay sa amo nga consultation ang reklamo sang pila ka mga residente nga nagabaho na ang landfill kag delikado sa ila nga ikaayong lawas.
Apesar sini, naaprubahan na sang Solid Waste Management Board ang request sang Victorias City kag igatalakay na ini sang Sanguniang Panlungsod Committee on Laws, Ordinances, and Good Government.
Ginsiling ni Councilor Al Espino, chairman sang amo nga komitiba nga dako man ang mabulig sang pag-ula sang basura sang Victorias sa landfill agud mapatuman na ang Waste-To-Energy sa Bacolod.
Suno sa iya, yara lang sa 600 tons per day ang basura nga gina-produce sang Bacolod apang 1,500 tubtob 2,000 tons per day ang requirement antes mapatukod ang WTE plant.
Sarang man nga ma-accommodate sang landfill ang basura gikan sa Victorias.
Ginaduso man sang konsehal nga kinahanglan magbayad ang Victorias sang tipping fee sa Bacolod agud macompensate man ang pag-accomodate sang siudad sa ila basura.
Natalana sini nga semana nga talakayon sang komitiba kag sang Solid Waste Management Board ang Memorandum of Agreement sang Victorias kag Bacolod.
Matapos sini, yara na sa Sanguniang Panlungsod ang desisyon kun tugutan ini ukon indi.
Apang, ginsiling naman ni Bacolod Mayor Greg Gasataya sa flag ceremony kaina sang aga nga wala kahilabtanan sa WTE project ang pag-ula sang basura sang Victorias sa Bacolod.
Suno sa iya bulig lamang sang siudad para sa Victorias nga sa karun nagapaobra pa lang sang ila kaugalingon nga sanitary landfill kag nagpangayo sang bulig sa local nga panguluhan sang Bacolod.
Isa lamang ka truck sang residual waste ang kada bulan sa sulod sang dose ka bulan ang i-accommodate sang Bacolod gikan sa Victorias, suno sa alkalde.
[sibwp_form id=1]