Probinsya sang Negros Occidental ang may masobra sa 14,000 ka dose sang AstraZeneca vaccines nga wala magamit kag nag expire.
Sa report ni Dr Claudelia Pabillo ang in-charge sang vaccine distribution sang probinsya, 1,462 ka vials sang AstraZeneca vaccines ukon 14,620 ka dose ang wala magamit kag nag expire. Kabahin ini sang 45,300 ka AstraZeneca vaccines nga nag abot sa probinsya sang November 8.
Ang amo nga batch sang bakuna ang may November 30 nga expiry date. Paathag ni Dr Pabillo, ang masobra sa 14,000 ka bakuna ang wala na malambot sa vaccine rollout bangud sang naga hilapit na ang expiry date, may mga banwa na kag siudad paagi sa ila nga mga health officer ang nag pabutyag sang ila nga preference ukon mas gusto nila sang bakuna nga mas may malawig pa nga expiry date.
Wala labot diri, ginhatagan man sang konsiderasyon ang potency ukon ang pag ka epektibo sang bakuna samtang nagahilapit ini sa expiry date.
“Wala na siya malambutan kay pag rollout namon vaccination day, ang iban indi na sila magbatun kay may available na nga iban nga vaccines. May nag-abot man ta nga additional nga vaccines, they preferred to use the other vaccines. Kay te siling nila kinahanglan mang engganyo sila sang pasyente”, suno kay Pabillo.
Suno kay provincial administrator Rayfrando Diaz importante ang safety sang mga mabakunaha.
“We value our vaccines. We want to use them. We do not delay. But we value more the vaccinees. Indi ta gusto magtusok sang manug-expire or expired nga vaccine”, suno kay Diaz.
Suno kay Pabillo, wala sang tuyo nga usikan ang resources sang gobyerno. Igabalik sa DOH Region 6 ang wala magamit kag nag expire nga bakuna nga sa karon nagapabilin sa cold room kag separado sa iban pa gid nga mga bakuna.