Sa committee hearing sang konseho sang Bacolod gin-present sang SM Prime Holdings Incorporated ang renovation project para sa Manokan Country nga kabahin sang kapin P4.5B project proposal para sa public private partnership project upod sa siudad.
Suno kay Councilor Al Victor Espino, pamuno sang Committee on Urban Planning kag Laws and Ordinances sang konseho, maga pa gwa sila sang committee report antes sang possible nga paghatag sang authority to sign kay Mayor Albee Benitez para sa kasugtanan upod sa SMPHI.
Gintanyag man sang SMPHI ang parking area para sa temporaryo nga sayluhan sang mga tenants sang Manokan kag ang libre nga 2 and 1/2 years nga pag gamit sang stalls sa sulod sang bag-o nga site.
P10,000 ang mangin monthly rental fee nga isukot sang SM sa mga tenants.
Pero naga-ayo naman si David Montoya, presidente sang Manokan Vendors Brotherhood Association nga kuntani indi lang sila mabutang sa parking lot bangud magamay ini para sa 27 ka mga tenants.
Ginhinyo niya man nga mapanubuan ang monthly rental fee ilabi na nga kalabanan sa ila ang may yara pa sang utang sa renta sa siudad.
Suno kay City Administrator Pacifico Maghari, III, ginatun-an naman sang siudad ang iban nga alternatibo nga lugar nga sarang sayluhan sang mga vendors sa tion nga suguran ang construction sang bag-o nga Manokan Country.