Nakilal-an sang babaye nga iya sang na-missing sini nga live-in partner ang shorts nga nakit-an upod sa mga tul-an sang tawo nga nakuha sa kampo sa Barangay Mansilingan, Bacolod City sang Martes.
Ginsiling ni Police Capt. Jay-R Reyes, hepe sang Station 7, nga suno sa mga himata, nadula ang lalaki sang Setyembre 14 kag tubtob subong wala pa makita.
Nagpadulong sa Station 7 ang mga himata sang lalaki, pati na ang iya live-in partner.
Suno sa live-in, ang shorts nga na-recover amo ang ginasuksok sang iya live-in kag masami sini nga ginasampawan sang delargo.
Ginkuhaan na sang swab sample ang iloy kag utod sang lalaki para sa DNA cross-matching sa tul-an, suno sa hepe.
Samtang, ginsiling ni Bacolod City Deputy City Director for Operations nga si Police Lt. Col. Albart Tare, nga ginpaidalom sa dental identification, skeletal examination kag DNA testing ang skeletal remains.
Ginahulat pa ang resulta sini.
[sibwp_form id=1]