May mga igo sang bala sa agtang, ilong kag natu-o nga guya ang lalaki nga nasapwan sa higad sang dalan sa Hacienda San Jose, Barangay Sag-ang sa banwa sang La Castellana, mga las 11 sang gab-i, Miyerkules, Hulyo 29.
Ginkilala ang biktima kay alyas “Dexter”, ginbulobanta 30 anyos, residente sang Brgy. Don Jorge Araneta sa Bago City kag temporaryo nga nagatiner sa Brgy. Sag-ang.
Nagwa sa imbestigasyon nga nakabugtaw ang lolo sang biktima kag nakita nga wala na ang iya apo sa sulod sang ila balay. Ila siya ginpangita kag didto nasapwan nga duguon sa higad sang dalan.
Suno sa saksi, apat ka sunod-sunod nga lupok sang pusil ang iya nabatian ugaling wala ini mag-gwa sa iya balay tungod sang kakulba.
Narekober sa crime scene ang apat ka fired cartridge cases, isa ka fired bullet slug kag duha ka deformed bullet slugs sang wala pa mahibaluan nga calibre sang pusil.
[sibwp_form id=1]