Si alyas Ka Pabling ang ginkilala kay Joery Dato-on Cocuba suno sa Philippine Army. 38 anyos nga residente sang Canetown, Barangay Consing sa banwa sang EB Magalona.
Suno sa army, ini ang ginkumpirma sa ila sang mismo nga residente sang amo nga lugar. Siya ang gina tudlo nga naga pangilkil kag kabahin sang mga NPA nga nag panunog sang heavy equipment sa Consing sa EB Magalona.
Samtang ang babaye naman nga gina kabig sang army lider sang NPA nga si Kerima Lorena Tariman ukon ka Ella ang gin cremate na sini nga hapon. Nagpadulong sa Silay City subong nga adlaw ang iya amay nga si Pablo Tariman para sugaton ang bangkay sang iya anak.
Sanday Pabling kag Ka Ella ang napatay sa encounter sa Kapitan Ramon sang nagligad nga Biyernes.
Napatay man ang soldado nga si PFC Christopher Alada.
Tigayon na naka balik sa Hacienda Raymunda sa Kapitan Ramon ang mga residente nga nag biya sa ila nga mga puluy-an matapos natabo ang encounter.